ungarathafnakonur

Sterkari saman – framtíðin er sterk!

Tue, 20 Oct 2026 20:43:11 GMT

Með því að stunda styrktarþjálfun
ertu að fjárfesta í framtíðinni

Þetta voru ein af lykilskilaboðum Arnhildar Önnu Árnadóttur og Hildar Karenar Jóhannsdóttur á viðburðinum Sterkari saman . Þar komu félagskonur saman til að hreyfa sig, fræðast og sækja innblástur um mikilvægi styrktarþjálfunar, bæði fyrir líkamlega og andlega heilsu.

Viðburðurinn hófst í Afrek þar sem félagskonur fengu tækifæri til þess að taka á því undir leiðsögn þeirra Arnhildar og Hildar Karenar. Að æfingu lokinni færði hópurinn sig yfir í Valsheimilið þar sem þær stöllur héldu fróðlegt og hvetjandi erindi um styrktarþjálfun, heilsu og mikilvægi þess að byggja upp sterkan líkama til framtíðar.

Við þökkum frábæru styrktaraðilum viðburðarins kærlega fyrir samstarfið og
hvetjum allar til að kynna sér starfsemi og vöruframboð þeirra.

Afrek - Maikai - Hleðsla - Heilsa - Wodbúð - Icepharma

Arnhildur Anna Árnadóttir er ein fremsta kraftlyftingakona Íslands og hefur á ferli sínum sett ansi mörg íslandsmet. Arnhildur hefur stundað lyftingar frá árinu 2011 og starfar í dag sem styrktarþjálfari, auk þess að hafa stofnað ADDA, þar sem konur geta stundað markvissa styrktarþjálfun í gegnum fjarþjálfun.

Hildur Karen Jóhannsdóttir hefur víðtæka reynslu af íþróttum og þjálfun. Hún hefur meðal annars stundað handbolta, dans og CrossFit en sérhæfir sig í dag í þjálfun kvenna á meðgöngu og eftir fæðingu. Hún þjálfar meðal annars afreksmömmur hjá Afrek og rekur fyrirtækið Móðurkraftur, sem býður konum upp á fjarþjálfun á þessu mikilvæga skeiði lífsins.

Styrkur snýst um meira en útlitið

Í erindinu lögðu þær áherslu á að styrktarþjálfun snerist um mun meira en útlit eða tölur á lóðum. Hún væri leið til að efla sjálfstraust, bæta heilsu og undirbúa líkamann fyrir þær fjölbreyttu áskoranir sem lífið hefur upp á að bjóða.

„Lyftingar eru besta yngingarlyfið,“ sagði Arnhildur og lagði áherslu á mikilvægi þess að viðhalda styrk og vöðvamassa eftir því sem árin líða.

Þær ræddu jafnframt hversu valdeflandi það væri að finna eigin styrk aukast. Að þora að reyna á sig, lyfta þyngra og að mistök væru mikilvægur hluti af því að ná árangri.

Að þora að taka pláss og verða sterkari

Eitt af þeim skilaboðum sem stóðu upp úr var mikilvægi þess að konur þori að taka pláss í líkamsræktarsalnum, ögra sjálfum sér og vera stoltar af eigin styrk.

Arnhildur rifjaði upp upphaf kraftlyftingaferils síns og hvernig hún hefði áður skammast sín fyrir að verða rauð í framan við æfingar eða nota lyftingabelti. Í dag er hún hvað stoltust af því að hafa þorað að stíga út fyrir þægindarammann þegar hún var ung.

Þær hvöttu konur til að vera óhræddar við að prófa þyngri lóð og minna sig á að mistök væru eðlilegur hluti af framförum. Til þess að byggja upp styrk þyrfti að reyna á líkamann og auka álagið með markvissum hætti.

Þær minntu einnig á að árangur byggðist ekki eingöngu á æfingunum sjálfum. Næg næring, góður svefn og hvíld væru lykilþættir í uppbyggingu líkamans.

Hildur Karen fjallaði sérstaklega um mikilvægi styrktarþjálfunar á meðgöngu og eftir fæðingu. Hún benti á að ýmsar mýtur væru enn við lýði um hreyfingu barnshafandi kvenna, þrátt fyrir að rannsóknir sýndu fram á margvíslegan ávinning af viðeigandi hreyfingu á meðgöngu.

Hún lagði áherslu á að fæðing væri mikið líkamlegt afrek sem krefðist bæði styrks og úthalds. Markviss þjálfun gæti því verið mikilvægur undirbúningur fyrir fæðingu og stuðlað að betri líkamlegri líðan og endurheimt eftir hana.

Þær ræddu einnig mikilvægi styrktarþjálfunar þegar konur eldast. Vöðvamassi hefur tilhneigingu til að minnka með aldrinum og því sé mikilvægt að byggja upp og viðhalda styrk alla ævi. Styrktarþjálfun geti meðal annars stuðlað að sterkari beinum, betri líkamlegri getu og auknum lífsgæðum.

Skilaboðin voru skýr: Það er aldrei of snemmt eða of seint að byrja að fjárfesta í eigin styrk.

Styrktarþjálfun á öllum æviskeiðum

„Tölum frekar um afrek heldur en útlit,“ voru skilaboð þeirra til félagskvenna.

Undir lok erindisins beindu Arnhildur og Hildur Karen sjónum sínum að samfélagslegum staðalímyndum og þeim skilaboðum sem ungar stúlkur og konur fá um líkama sinn.

Þær bentu á að samfélagsmiðlar ýttu gjarnan undir einhæfar hugmyndir um útlit og líkamsvöxt, þar sem áherslan væri of oft á að vera grönn fremur en sterk og heilbrigð.

Þær lögðu áherslu á að kenna ungum stúlkum að meta líkama sinn út frá því sem hann getur gert, fremur en hvernig hann lítur út. Líkaminn sé verkfæri sem gerir okkur kleift að takast á við verkefni lífsins, upplifa nýja hluti og ná markmiðum okkar.

Viðburðurinn Sterkari saman var þannig ekki aðeins hvatning til að lyfta lóðum, heldur einnig áminning um mikilvægi þess að trúa á eigin getu, þora að ögra sjálfri sér og vera fyrirmyndir fyrir næstu kynslóð kvenna.

Framtíðin er sterk – ekki skinny

Því framtíðin er sterk – og saman erum við sterkari!

Ungar athafnakonur þakka Arnhildi Önnu og Hildi Karen kærlega fyrir fróðlegt, skemmtilegt og hvetjandi erindi, sem og öllum þeim félagskonum sem tóku þátt í viðburðinum.

Við þökkum styrktaraðilum viðburðarins einnig kærlega fyrir sitt framlag.

Maikai, Hleðsla, Heilsa, Wodbúð og Icepharma

Tengsl, tækifæri og að taka pláss

Tue, 29 Sep 2026 15:58:45 GMT

Hún tengir - Tengslakvöld UAK 24.september

Tengslanet, mentorar og mikilvægi þess að koma sér á framfæri voru í forgrunni þegar Erna Hrund Hermannsdóttir og Arna Harðardóttir deildu reynslu sinni úr íslensku atvinnulífi. Í

einlægu samtali ræddu þær meðal annars um að byggja markvisst upp tengsl, leita til fólks sem getur veitt ný sjónarhorn og segja já við tækifærum – jafnvel þegar maður er ekki alveg viss um að vera tilbúinn.

„Konur hafa svo mikið fram að færa“

Erna Hrund sagði frá því hvernig hugmyndin að hlaðvarpinu “Hún tengir” varð til á tímamótum á hennar eigin starfsferli. Eftir stöðuhækkun hafði hún þrjá mentora sem hún sagði hafa reynst sér vel. Með tímanum áttaði hún sig þó á því að hún þyrfti einnig annars konar ráðgjöf og fyrirmyndir sem gætu tengt við þær áskoranir sem hún sjálf stóð frammi fyrir.

Eftir mikla sjálfsskoðun tók Erna ákvörðun um að segja starfi sínu lausu. Á þessum tíma fór hún að opna sig meira við aðrar konur um þær áskoranir sem hún hafði upplifað í starfi. Fljótlega varð henni ljóst að hún var langt frá því að vera ein um þessa reynslu.

Það varð kveikjan að “Hún tengir”, þar sem Erna vildi ræða við konur sem hafa náð árangri í íslensku atvinnulífi og skapa vettvang þar sem þær gætu sagt frá eigin reynslu.

„Með hlaðvarpinu vildi ég gefa konum pall til að tala um sjálfa sig. Þær hafa svo mikið fram að færa.“

Erna býður viðmælendum sínum gjarnan í kaffi áður en upptökur hefjast til að kynnast þeim betur. Kaffibollinn sem hún tók með Örnu Harðardóttur varð þó óvenjulega langur, en samtalið stóð yfir í tvo til þrjá tíma. Þar hófust tengsl sem hafa síðan þróast áfram.

Arna Harðardóttir er forstjóri Helix, heilbrigðistæknifyrirtækis með um 45 starfsmenn. Hún hefur gegnt stöðu forstjóra í þrjú ár en fyrirtækið var áður hluti af Origo. Verkefni Örnu var að spinna starfsemina út í sjálfstætt fyrirtæki og hefur hún stýrt því síðan.

Í hennar huga gerast öflug tengslanet ekki af sjálfu sér.

„Það þarf hugrekki til að ákveða að byggja upp tengslin sín.“

Arna lagði sérstaka áherslu á mikilvægi mentora. Að hafa einhvern til að ræða við um næstu skref, áskoranir og að eigin þróun geti verið gríðarlega dýrmæt. Það þurfi heldur ekki að vera flókið að finna mentor. Stundum sé fyrsta skrefið einfaldlega að senda skilaboð á manneskju sem maður ber traust til og spyrja.

Erna tók undir þetta og hvatti konur til að láta vaða. Sá sem er beðinn um að gerast mentor geti sjálfur séð verðmæti í sambandinu enda sé lærdómurinn sjaldnast aðeins í aðra áttina.

Þær ræddu einnig um mikilvægi þess að leita ekki eingöngu til fólks sem er líkt manni sjálfum. Ólíkir mentorar geta veitt ólík sjónarhorn og stundum eru það einmitt ráðin frá fólki með allt annan bakgrunn sem reynast verðmætust.

Að taka pláss við borðið

Arna ræddi einnig reynslu sína af því að taka við stjórnendastöðu í karllægu umhverfi. Þegar hún tók við sem forstjóri var hún meðal annars spurð á ganginum hvort ráðning hennar væri tímabundin.

Á fundum upplifði hún jafnframt að erfitt gæti verið að ná athygli viðstaddra. Hún var vön því að vera eina konan við fundarborðið en upplifði jafnvel að ekki væri horft í augun á henni þegar hún talaði.

Þá fékk hún einfalt en áhrifaríkt ráð frá mentor sínum: Sestu fyrir miðju fundarborðinu, þar sem allir sjá þig.

Ráðið snerist um meira en sætaskipan. Það snerist um að taka pláss, hefja fundinn af krafti og gera sig sýnilega.

Reynsla Ernu og Örnu sýndi jafnframt hversu ólík ráð geta verið eftir því hver veitir þau. Þess vegna geti verið verðmætt að leita til ólíkra mentora – kvenna og karla, fólks með svipaðan bakgrunn og manns eigin en líka þeirra sem sjá hlutina frá allt öðru sjónarhorni.

„Með því að segja já kemst maður í ótrúlegar aðstæður“

Eitt af sterkustu stefjum samtalsins var mikilvægi þess að segja já.

Arna hvatti konur til að setja sig viljandi í nýjar og jafnvel óþægilegar aðstæður. Þróun í starfi þyrfti ekki alltaf að þýða nýr titill eða stjórnendastaða. Hún geti allt eins falist í því að taka að sér ný verkefni, prófa eitthvað óvænt og stíga reglulega út fyrir þægindarammann.

Skilaboðin voru einföld: Prófaðu. Segðu já, og jafnvel þótt eitthvað fari ekki fullkomlega er það allt í lagi.

Orðsporið fylgir okkur

Arna lagði einnig mikla áherslu á orðspor og þau áhrif sem framkoma okkar hefur til lengri tíma.

„Orðsporið er gríðarlega mikilvægt. Orðsporið er algjör lykill og það sem kemur okkur áfram í þessu litla samfélagi.“

Þegar Arna hætti störfum hjá Ölgerðinni áttaði hún sig meðal annars á því hversu verðmætt tengslanet hún hafði byggt upp í gegnum árin.

Í umræðum um hvernig hægt sé að byggja upp og varðveita gott orðspor nefndi Erna nokkur atriði: að vera með skýr gildi, vita hvert maður stefnir, mæta á viðburði, vera sýnileg á LinkedIn og – ekki síst – hvetja aðra áfram.

Hún lagði sérstaka áherslu á eina reglu: Að tala ekki illa um aðra.

Arna hvatti konur sömuleiðis til að horfa út fyrir þröngan ramma eigin starfs. Að koma sér á framfæri geti vissulega kallað fram smá kjánahroll í byrjun en sýnileiki skapi tækifæri. Það geti til dæmis falist í því að sækja um að halda erindi á ráðstefnu eða taka að sér verkefni sem maður hefði áður talið vera fyrir „einhvern annan“.

Eftir öll þau samtöl sem Erna hefur átt við konur í hlaðvarpinu sínu “Hún tengir” segir hún einn rauðan þráð koma aftur og aftur fram:

„Allar konurnar sem hafa komið í Hún tengir segja það sama: Við þurfum tengslanet.“

En öflugt tengslanet byggist ekki eingöngu á því hvað aðrir geta gert fyrir okkur. Það snýst líka um hvernig við mætum öðru fólki.

Erna ræddi meðal annars um mikilvægi þess að festast ekki í samanburði eða öfund þegar aðrar konur fá tækifæri. Í stað þess að velta fyrir sér „af hverju er hún þarna?“ sé gagnlegra að styðja við árangur annarra og treysta því að eigin tækifæri komi.

Sama eigi við þegar við hittum fólk sem við teljum í fyrstu að við eigum lítið sameiginlegt með. Það geti borgað sig að mæta, taka samtalið og setja sig í nýjar aðstæður. Oft geti verðmæt tengsl skapast þar sem maður átti síst von á þeim.

Skilaboð Ernu og Örnu voru skýr: Byggðu upp tengsl áður en þú þarft á þeim að halda. Leitaðu að fólki sem getur kennt þér eitthvað. Segðu já við tækifærum. Taktu pláss og ekki gleyma að lyfta öðrum með þér.

„Við þurfum tengslanet“

Hugrekki, seigla og krafturinn í að þora

Thu, 17 Sep 2026 17:48:47 GMT

Opnunarviðburður haustannar, 9. september 2026

Hugrekki, seigla og það að þora að fara sínar eigin leiðir voru í forgrunni á opnunarviðburði UAK þar sem Áslaug Arna Sigurbjörnsdóttir, Vijona Salome og Guðrún Karls Helgudóttir deildu persónulegri reynslu sinni og lærdómi úr lífi og starfi. Þrátt fyrir ólíkan bakgrunn og ólíkar vegferðir áttu sögur þeirra margt sameiginlegt – að standa með sjálfri sér, takast á við mótlæti og þora að taka næsta skref.

Áslaug Arna ræddi um lærdóminn af því að leiða ung og hvernig sannfæring, lífsreynsla, gagnrýni og mistök hafa mótað hana. Hún sagðist hafa verið heppin að finna ástríðu sína snemma en lagði áherslu á að ástríða detti ekki af himnum ofan. Hún verði til þegar við finnum hvar áhugi okkar liggur og ræktum hann.

Persónuleg reynsla hefur einnig mótað hennar vegferð. Að alast upp með fatlaðri systur kom henni snemma í þjónustuhlutverk og missir foreldris kenndi henni að nýta tímann og vera óhræddari við að taka áhættu. Hún hefur gjarnan beðið um „stærri skó“ en hún passaði í hverju sinni og lagði áherslu á að reynsla ungs fólks væri ekki síður dýrmæt en þeirra sem reyndari eru.
Mikilvægi góðs teymis var henni einnig ofarlega í huga. „Þú gerir ekkert einn,“ voru skýr skilaboð og ræddi hún meðal annars um mikilvægi þess að konur styðji hver aðra og leyfi ekki öðrum að stilla þeim upp gegn hvor annarri.

"Þú gerir ekkert ein/einn"

Áslaug ræddi einnig opinskátt um gagnrýni, mistök og ósigra. Með tímanum hefði hún lært hvað væri gagnlegt að taka til sín og hverju ætti að ýta frá sér. Hún benti jafnframt á að ráðleggingar fólks mótist oft af eigin þægindaramma þess – fólk ráðleggi öðrum út frá því sem það sjálft myndi þora að gera. Erfiðar ákvarðanir geti verið réttar ákvarðanir og mistök séu nauðsynlegur hluti þess að ná markmiðum sínum.

Áslaug Arna Sigurbjörnsdóttir, Senior Director, AI Partnership at Fenris Creations

„Ég dett, stend upp og held áfram,“ voru kjarnaskilaboð Vijonu Salome, frumkvöðuls, áhrifavalds og einkaþjálfara. Hún deildi áhrifamikilli sögu sinni, allt frá erfiðri æsku og einelti yfir í frumkvöðlastarf og þann vettvang sem hún hefur skapað sér í dag.

Vijona flutti ung til Íslands og upplifði mikla óvissu á fyrstu árum sínum hér á landi. Í grunnskóla varð hún fyrir einelti vegna uppruna síns, tungumáls og útlits og með tímanum fór hún sjálf að trúa neikvæðu skilaboðunum sem hún fékk. Vendipunktur varð þegar hún skráði sig á Dale Carnegie-námskeið og þurfti að standa upp fyrir framan aðra og segja sögu sína. Þegar fólk hlustaði, áttaði hún sig á því að reynsla hennar og rödd hefðu gildi.

Síðar ákvað hún að keppa í fitness. Skömmu fyrir keppni féll hún niður tröppur og slasaðist en ákvað þrátt fyrir það að mæta til leiks og varð þrefaldur Íslandsmeistari. Atvikið varð táknrænt fyrir hennar vegferð: Hún datt, stóð upp og hélt áfram.
Vijona sagði jafnframt frá frumkvöðlastarfi sínu á Spáni og hvernig hún hefur eftir heimkomuna til Íslands byggt upp vettvang á samfélagsmiðlum. Athyglinni hefur einnig fylgt hörð gagnrýni en í stað þess að draga sig í hlé ákvað hún að standa með sjálfri sér. Skilaboðin voru skýr: Hindranir munu koma og því eigi ekki að bíða eftir „rétta augnablikinu“ til að láta vaða.

"Ég dett, stend upp og held áfram"

Að lokum deildi Guðrún Karls Helgudóttir, biskup Íslands, reynslu sinni af því að feta eigin leið innan stofnunar þar sem sterkar hefðir og hugmyndir eru um hvernig leiðtogi eigi að vera. Hún sagði frá því hvernig fólk hefði hvatt hana til að íhuga biskupsembættið áður en hún sjálf leyfði sér að segja upphátt að hún væri tilbúin að taka það að sér.

Eftir kjörið áttaði Guðrún sig fljótt á því að margir hefðu skoðanir á því hvernig hún ætti að vera sem biskup. Hún lagði hins vegar áherslu á að hún hefði ekki verið kosin vegna þess að hún væri eins og einhver annar heldur vegna þess hver hún væri sjálf.

Hún ræddi einnig um mikilvægi þess að byggja brýr milli fólks. Í samtölum um trú hefði hún tekið eftir því að svör fólks væru sjaldnast einfalt „já“ eða „nei“, heldur gjarnan „já, en“ eða „nei, en“. Í þessu „en“ væri hægt að finna sameiginleg gildi á borð við frið, ást og fyrirgefningu.

Þótt sögur Áslaugar, Vijonu og Guðrúnar séu ólíkar komu þær allar inn á sömu grundvallaratriðin: að treysta eigin rödd, þora að taka pláss og leyfa ekki væntingum annarra að ákveða hversu langt maður getur farið.

Viðburðurinn var bæði persónulegur og hvetjandi og minnti gesti á að hugrekki felst ekki í því að vera óhræddur, heldur að þora að taka næsta skref þrátt fyrir óvissuna – detta, standa aftur upp og halda áfram.

"Ef við myndum aldrei þora, þá myndum við aldrei gera neitt"

Fyrirtækjaheimsókn til Sjóvá: frá botni upp á topp!

Thu, 07 May 2026 13:52:13 GMT

Innblástur frá Sjóvá: Mannlegi þátturinn lykill að árangri

Félagskonum UAK bauðst að fara í fyrirtækjaheimsókn til elsta og reyndasta tryggingafélags landsis, Sjóvá. Fulltrúar úr stjórnendateymi þeirra veittu innsýn í rekstur, starfsanda og vegferð stærsta tryggingafélags landsins.

Þær Lára Hrafnsdóttir, forstöðumaður markaðsmála, Elín Þórunn Eiríksdóttir, framkvæmdastjóri tjónaþjónustu og Sigríður Vala Halldórsdóttir, framkvæmdastjóri fjármála og upplýsingatækni, sögðu frá sínum starfsferli og því hvernig fjölbreytt reynsla hefur mótað þær sem leiðtoga.

Lára rifjaði upp fjölbreyttan bakgrunn sinn, meðal annars frá námi erlendis og störf í banka og nýsköpunarumhverfinu, hún lagði áherslu á mikilvægi skýrra boðleiða og teymisvinnu sem ríkir sannarlega hjá Sjóvá. Elín Þórunn, sem hefur starfað hjá Sjóvá í 14 ár, ræddi um gildi þess að þróast í starfi og vinna með fólki sem ögrar manni. Sigríður Vala deildi reynslu sinni úr fjármálageiranum og mikilvægi þess að finna jafnvægi milli áskorana og vellíðunar í starfi.

Sjóvá var stofnað árið 1918 og hefur það hlutverk að stuðla að betra samfélagi með fræðslu, forvörnum og öflugri þjónustu. Félagið þjónustar í dag um 85.000 einstaklinga, 43.000 fjölskyldur og tæplega 9.000 fyrirtæki, með 189 starfsmenn á 16 starfsstöðvum um allt land.

Áhersla var lögð á að árangur fyrirtækisins byggist á sterkri keðju þar sem ánægðir starfsmenn leiða til ánægðra viðskiptavina. Sjóvá hefur verið efst tryggingafélaga í íslensku ánægjuvoginni í níu ár í röð og markvisst unnið að því að byggja upp traust í geira þar sem það er oft takmarkað. Þær sögðu frá því að fyrir nokkrum árum mældust þau neðst og því er þetta gríðarlega stór áfangi að hafa komist á toppinn og haldist þar níu ár í röð. Eitt af því sem þær sögðu stoltar frá var meðgöngutrygging þeirra, en það er sér vara og er hægt að breyta henni síðan yfir í barnatryggingu. Sjóvá voru fyrst á Íslandi til að bjóða upp á meðgöngutryggingu.

Tjónaþjónusta félagsins gegnir lykilhlutverki en þar er starfsfólk á vakt allan sólarhringinn til að bregðast hratt við og lágmarka tjón. Slík viðbrögð hafa ekki aðeins áhrif á upplifun viðskiptavina heldur einnig á framtíðariðgjöld og rekstur félagsins í heild.

Einnig var farið yfir mannauðsmál en Sjóvá leggur áherslu á jafnt kynjahlutfall, fjölbreytta reynslu og sterka starfsþróun. Um helmingur ráðninga á síðasta ári var innanhúss, sem endurspeglar tækifæri starfsfólks til að vaxa innan fyrirtækisins. Aldursdreifing er jöfn og meðalstarfsaldur er rúm 9 ár, sem bendir til stöðugleika og ánægju í starfi.

Þá var tæknimálum gerð góð skil en Sjóvá rekur öflugt og nútímalegt tækniumhverfi þar sem gervigreind gegnir sífellt stærra hlutverki. Um helmingur fyrirspurna er nú afgreiddur sjálfvirkt, en jafnframt var lögð áhersla á að tæknin ein og sér skili ekki bara árangri heldur sé mannlegi þátturinn lykilatriði.

Að lokum var farið yfir markaðsstarf og samfélagsábyrgð félagsins.
Sjóvá hefur t.d. styrkt Landsbjörg í 27 ár og er aðalstyrktaraðili Landsbjargar allt frá 1999. Sjóvá hefur unnið náið með öðrum fyrirtækjum líkt og t.d. Samgöngustofu til að sporna gegn farsímanotkun undir stýri. Nýleg herferð þar sem raunverulegir viðskiptavinir voru í forgrunni vakti mikla athygli og bárust hundruð umsókna á örfáum dögum. Þá hefur samstarf við Geðhjálp skilað umtalsverðum styrkjum til geðheilbrigðismála og bentu þær á heimasíðuna ánægja er þar sem hægt er að skrifa inn það sem veitir okkur ánægju og um leið styrkja Geðhjálp í boði Sjóvá.

Heimsóknin var afar fræðandi og veitti innsýn í hvernig skýr stefna, öflug fyrirtækjamenning og fókus á fólk getur skapað framúrskarandi árangur í samkeppnisumhverfi sem tryggingaheimurinn er.

Ráðstefna UAK 2026: Hvernig skapar jafnrétti árangur fyrir öll

Thu, 07 May 2026 12:50:45 GMT

Nýja árstíðin er góð ástæða til að taka og halda ályktanir. Hvort sem það er að borða rétt eða þrífa bílskúrinn, hér eru nokkur ráð til að gera og halda ályktanir.

Gerðu lista

Listar eru frábærar leiðir til að halda sér á réttri braut. Skrifaðu niður nokkra stóra hluti sem þú vilt ná og smá hluti líka.

Athugaðu listann reglulega

Ekki gleyma að kíkja inn og sjá hvernig þér gengur. Þó þú náir ekki stóru markmiðunum strax þýðir það ekki að þú sért ekki að taka framförum.

Verðlaunaðu sjálfan þig

Þegar þér tekst að ná markmiði, hvort sem það er stórt eða lítið, vertu viss um að klappa sjálfum þér á bakið.

Hugsaðu jákvætt

Jákvæð hugsun er stór þáttur í velgengni. Svo í stað þess að velta fyrir sér hlutum sem fóru ekki alveg rétt, minntu þig á hluti sem gerðu það.